الأحد، 30 أكتوبر 2016

محسن طحناتو الدولة على "حوتة" أما هاجر وصاحبتها ولي بحالها طحناتهم الدولة و المجتمع و الدين على "بوسة"

أرشيف

طارق الناجي - مجلة أقليات

كولشي غادي يكون شاف وسمع وقرا شنو وقع في الحسيمة نهار الجمعة كولشي شاف بعينيه مواطن مغربي ابن هاد البلاد كايخلص ضرائبها و كايأدي داك "الواجب" دايل "أجي تصوت".. كولشي شافو مطحون، فين ؟ فشاحنة، ديالاش ؟ ديال الزبل نعاماس .. كولشي شافو وهو كايتلاح فهاد الشاحنة باش يجبد و يرجع "رزقو" رزقو لي جابو بعرق كتافو، باش مايبقاش جالس بحال ملايين الشباب و الشابات لي مالقاوش فين يخدمو، لي نكحاتهم الدولة بسياسة "سد الروبني" على ولاد الشعب ...

محسن لي طحناتو الدولة فكاميو ديال الزبل ما هو إلى قطرة صغيرة من بحر ديال المواطنين و المواطنات لي طحناتهم الدولة و غادي تبقى كاطحن فيهم كولا نهار .. محسن ماشي لوحده لي تطحن فهاد البلاد غا كولا واحد وكيف طحناتو .. حتى الأقليات فهاد البلاد مطحونة ويمكن مطحونة أكثر، إلى كان "محسن" تطحن على "حوتة" فراه "هاجر بنت مراكش" تطحنات على "بوسة" أييه على "قبلة" .. طحناتها الدولة هي وصاحبتها حيت كايتباغاو حيث الحب ديالهم مختالف على الحب ديال المقدم و قايد و عامل و رئيس المحكومة و حتى على مول شي .. طحناتهم الدولة لبارح حتى هوما حيت تباوسو فوق السطح، حيت ماخلات ليهم الدولة حتى قنت فين يتباوسو طلعو للسطح ديال دارهم بحال شي طويرات وختارو يغردو على طريقتهم الخاصة، إذا فين كاين الموشكيل باش طحنهم الدولة ؟؟ طبعا ماكاين حتى موشكيل غير الدولة باغا طحن كولشي وماتخلي حتى شي "قوا.." كايغرد خارج التغريد الرسمي ديال الدولة.

محسن طحناتو الدولة في كاميو ديال الزبل، هاجر وصاحبتها طحناتهم الدولة في زنزانة لمدة 3 سنوات فقط حيت كايحبو بعضياتهم، وماشي غير هاجر وصاحبتها، الدولة طحناااات المئات من الناس لي كايحبو بشكل مختلف، ولي كايآمنو بدين مختلف على "دين الدولة"...

محسن وكاع الناس لي بحالو طحناتهم غير الدولة، أما هاجر وصاحبتها ولي بحالها طحناتهم الدولة و طحنهم المجتمع و طحنهم الدين حتى هو.


اذا كانت شي حاجة ليوم لي خاصنا نترحمو عليها، فهي الإنسانية ديالنا، و الضمير لي مات فينا .. محسن و هاجر وصاحبتها وكاع الناس لي طحناتهم الدولة، ذنوبهم على هاد المجتمع لي رضا البذل و القهرة و الظلم بلاما يقول حتى لاهم إن هذا منكر. 

المشاركة

هناك تعليق واحد:

  1. Omg I cant believe this actually happened in Morocco, the country I've been proud to belong to for 22 years
    Mafhemtch 3laaaaach nas saktéiiine 3laaach manaduuch daru mudahar fmarrakech wfga3 le Maroc pour elles!!!!?????

    ردحذف